Noyabr ayınıń aqırında Aral teńiziniń qurıǵan túbi aymaǵında Ózbekstan Respublikası Ekologiya, qorshaǵan ortalıqtı qorǵaw hám klimat ózgeriwi boyınsha milliy komiteti janındaǵı Aralboyı xalıqaralıq innovaciya orayı tárepinen, "Meniń baǵım Aral teńizinde" joybarı sheńberinde keń kólemli ekologiyalıq ilajlar ótkerildi. Bul baslamalar Siberian Wellness (Sibirskoe zdorovie) hám Nestlé kompaniyalarınıń finanslıq hám ámeliy járdemi menen ámelge asırıldı. Olar regionnıń ekologiyalıq turaqlılıǵın tiklewge turaqlı hám áhmietli úles qosıp kelmekte.
Ilaj dawamında 26 000 túp seksewil nálleri egiw baslandı. Nestlé járdeminde Araldıń qurıǵan ultanına 11 000 túp nál egildi, Siberian Wellness jámááti bolsa Aralboyı xalıqaralıq innovaciya orayı menen birgelikte jáne 15 000 túp nál egiwdi támiyinledi. Nátiyjede, Araldıń qurıǵan aymaǵındaǵı jasıl maydanlar jáne 26 gektarǵa keńeydi. Birge islesiwshilerdiń bunday belsendiligi tek ǵana regiondı jedel kóklemzarlastırıwǵa xızmet etip qoymastan, al biznestiń tábiyattı saqlaw hám Aralboyı keleshegi ushın juwapkershilikli qatnasın kórsetpekte.
Aralboyı xalıqaralıq innovaciya orayınıń Siberian Wellness hám Nestlé kompaniyaları menen birge islesiwi Aralboyı ekosistemasın tiklew boyınsha uzaq múddetli strategiyanıń áhmietli bólegi bolıp barmaqta. Keń kólemdegi saxovıl eginleri shań boranlarınıń intensivligin azaytadı, qumlı topıraqlardı turaqlastıradı hám keleshektegi jasıl maydanlar ushın áhmietli tiykar jaratadı. Bul bolsa regionnıń mikroklimatın jaqsılap, xalıqtıń turmıs sapasına sezilerli tásir kórsetedi.
Sonı ayrıqsha atap ótiw kerek, Siberian Wellness hám Nestlé kompaniyalarınıń Araldıń qurıǵan aymaǵında ótip atırǵan ekologiyalıq baslamalarda turaqlı qatnasıwı jaqsı dástúrge aylanbaqta. Bul kompaniyalar hár jılı Aralboyı tábiyatın tiklew, xalıqtıń salamatlıǵın saqlaw baǵdarında tereń sadıqlıǵın kórsetip kelmekte. Olardıń izbe-iz járdemi regionnıń ekologiyalıq keleshegi ushın joqarı sociallıq juwapkershilik hám uzaqtı kóre alatuǵın qatnastı tastıyıqlaydı.
Aralboyı xalıqaralıq innovaciya orayı Siberian Wellness hám Nestlé kompaniyalarına kórsetken baslaması, region flora hám faunasın tiklewge qosqan úlken úlesi jáne xalıq hám keleshek áwladlar salamatlıǵı ushın jaratılıp atırǵan qolaylı sharayatlar ushın shın júrekten minnetdarshılıq bildiredi![wds id="301"]
