Tashkenttegi “Green University”de Oraylıq Aziya ekologiya hám qorshaǵan ortalıqtı izertlewler orayınıń saltanatlı ashılıw máresimi bolıp ótti. Bul jańa ilimiy oray regionallıq ekologiyalıq izertlewlerdiń tiykarǵı shtab-kvartirasına aylanıwı rejelestirilgen. Oray Ózbekstan Respublikası Ekologiya hám klimat ózgeriwi milliy komiteti hám Qıtay Ilimler akademiyası (CAS) menen birge islesiw sheńberinde shólkemlestirildi. Joybar sheńberinde Qıtaydıń eki jetekshi ilimiy institutı – Sinczan ekologiya hám geografiya institutı (XIEG) jáne Arqa-batıs ekologiya hám tábiyǵıy resurslar institutı (NIEER) belsene qatnaspaqta. Ashılıw máresiminde mámleketlik uyımlar, ilimiy toparlar, diplomatiyalıq missiyalar hám jeke menshik sektor wákillerinen ibarat 100 den aslam miyman qatnastı. Qızıl lenta Ekologiya ministriniń orınbasarı Jusipbek Kazbekov hám XIEG direktorı Chjan Yuanmin tárepinen kesildi.
Ushırasıw dawamında Jusipbek Kazbekov oraydıń tiykarǵı wazıypaların atap ótti: “qurǵaqshıl ekosistemalar boyınsha sanlı maǵlıwmatlar bazasın jaratıw, shólleniw hám shorlanıw sharayatında qorshaǵan ortalıqtaǵı ózgerislerdi prognozlaw, sonday-aq, shól aymaqları ekonomikasın rawajlandırıw boyınsha innovaciyalıq strategiyalardı islep shıǵıw.” Oray tolıq iske qosılǵannan soń, jılına 50 ge shamalas jergilikli hám sırt el ilimpazların qabıl etiwi rejelestirilgen bolıp, regiondaǵı eń iri ekologiyalıq maǵlıwmatlar toplamlarınan birine ie boladı.
XIEG direktorı Chjan Yuanmin jańa ilimiy oray “regionda ózine tán birinshi sonday mákeme” bolatuǵının, ol ilimiy birge islesiwdi bekkemlew hám Oraylıq Aziya ekologiyalıq shaqırıqlarına sheshim tabıwǵa qaratılǵan keń kólemli izertlewlerdi ámelge asıratuǵının atap ótti.
Toǵay hám jasıl aymaqlardı kóbeytiw, shólleniwge qarsı gúresiw agentliginiń direktorı Erkin Muxitdinov mámleket aymaǵınıń 80 procenti shól hám qurǵaq jerler ekenin esletip, oraydıń toǵay xojalıǵı nátiyjeliligin arttırıwdaǵı strategiyalıq roline itibar qarattı. Onıń sózlerine bola, orayda alıp barılatuǵın izertlewler jer degradaciyasına qarsı gúresiw, landshaftlardı tiklew hám jasıl aymaqlardı keńeytiwde áhmietli ilimiy tiykar bolıp xızmet etedi. Sonday-aq, XIEG menen tabıslı birge islesiw tájiriybesi de atap ótildi. Sonıń ishinde, Qıtay birge islesiwshileri tárepinen usınılǵan tuqımlar tiykarında Ózbekstannıń bes aymaǵında galofit baǵları shólkemlestirildi.
Oray xalıqaralıq ilimiy birge islesiwdi rawajlandırıwdıń tiykarǵı maydanına aylanıwı kútilmekte. Qospa izertlewler, akademiyalıq almasıwlar hám innovaciyalıq joybarlar Oraylıq Aziya mámleketleri hám Qıtay arasında qorshaǵan ortalıqtı qorǵaw hám klimat ózgeriwine beyimlesiw boyınsha birge islesiwdi jáne de bekkemlewge xızmet etedi.
